Dywedodd Aled Jones, Llywydd NFU Cymru: “Boed e’n Gig Oen a Chig Eidion Cymru PGI byd-enwog, yn Datws cynnar PGI Sir Benfro, yn gig dofednod neu’n wyau, yn llaeth Cymreig blasus, iach, ein cawsiau blasus Cymreig, ein cnydau grawn neu’r genhinen fach ddi-nod – mae Cymru yn enwog am fwyd lleol o ansawdd uchel. Mae’n rhywbeth y gall y wlad gyfan fod yn falch ohono.

“Dros y flwyddyn diwethaf, gwelwyd cynnydd aruthrol yng nghefnogaeth y cyhoedd i fwyd o Gymru a ffermwyr Cymru. Fe wnaeth yr arolwg o ddefnyddwyr y gwnaethom ei gynnal y gaeaf diwethaf dynnu sylw at y ffaith bod 82% o drigolion Cymru yn gefnogol i’r llywodraeth roi cyllid i ffermwyr i gynhyrchu bwyd, ac mae cefnogaeth pobl Cymru wedi bod yn allweddol yn y protestiadau a welsom gan y diwydiant yn gynharach eleni. Gwn hefyd fod aelodau a staff NFU Cymru wedi cael eu syfrdanu gan yr ymateb cadarnhaol i arddangosfa’r undeb o 5,500 o welis ar risiau’r Senedd ym mis Mawrth. Mae hyn i gyd yn pwyntio at y ffaith bod bwyd o Gymru yn bwysig iawn i drigolion Cymru a’u bod am weld ffermwyr yn cael eu cefnogi i ddal ati i gynhyrchu’r bwyd hwnnw.

“Nod ein hymgyrch Diogelu Dyfodol Bwyd Cymru yw ceisio dod â’r diwydiant at ei gilydd a dangos y gefnogaeth aruthrol sydd yna i fwyd a gynhyrchir yng Nghymru gan ffermwyr ein gwlad. Yr ymdeimlad o undod ymysg ffermwyr Cymru fu eu cryfder mwyaf erioed, mae’n bryd defnyddio’r pŵer cyfunol hwnnw i weithio gyda’n gilydd i wneud yr ymgyrch hwn yn llwyddiant gyda’r cyhoedd. Llofnodwch y ddeiseb heddiw ac yna gwnewch bopeth o fewn eich gallu i gael pawb arall i wneud yr un peth.”

Dywedodd Abi Reader, Dirprwy Lywydd NFU Cymru: “Cafwyd llawer o ddadlau am ddyfodol y polisi ffermio yng Nghymru dros fisoedd lawer. Mae’n gliriach nag erioed o’r blaen fod y pryderon ynghylch effaith y polisïau hynny ar allu ffermwyr i gynhyrchu bwyd yn cael eu rhannu nid yn unig ymysg y diwydiant, ond ymysg y cyhoedd hefyd. Fel ffermwyr, mae sicrhau bod llais y cyhoedd yn cael ei glywed fel rhan o’n hymdrechion i Ddiogelu Dyfodol Bwyd Cymru er budd pawb ohonom.

“Ar adeg pan mae cynhyrchiant bwyd o dan straen ym mhob cwr o’r byd oherwydd effeithiau newid hinsawdd a gwrthdaro byd-eang, ni allwn fforddio llesteirio’r gwaith o gynhyrchu bwyd diogel o ansawdd uchel a wneir mewn hinsawdd sy’n berffaith ar gyfer cynhyrchu llaeth, cig, tatws, cnydau a llysiau. Mae ein hasedau naturiol yma yng Nghymru, sef glawiad uchel a thwf glaswellt toreithiog, yn golygu y gall ein ffermwyr yn hawdd honni eu bod yn cynhyrchu rhai o fwydydd mwyaf eco-gyfeillgar y byd. Rydym mewn sefyllfa dda i gyflawni ein huchelgeisiau ond mae angen inni sicrhau bod polisi Cymru yn cyd-fynd â’r weledigaeth honno sy’n rhoi bwyd yn gyntaf.

“Mae angen i gynifer o bobl â phosibl lofnodi’r ddeiseb ar wefan NFU Cymru, naill ai yn Gymraeg neu’n Saesneg, er mwyn ennyn y gefnogaeth hon i fwyd o Gymru a sicrhau bod hynny ym meddyliau’r llunwyr polisïau pan fyddant yn cwblhau cynlluniau i’r dyfodol. Nid oes dim amheuaeth bod y cyhoedd yng Nghymru eisiau i’r cynlluniau hyn alluogi ein ffermwyr i gynhyrchu bwyd diogel, cynaliadwy o ansawdd uchel.”